Me dhimbje të thellë, Grupi Armani ka njoftuar sot ndarjen nga jeta të themeluesit dhe frymëzuesit të tij të përjetshëm, Giorgio Armani. “Zoti Armani – siç është quajtur gjithmonë me respekt dhe admirim nga punonjësit dhe bashkëpunëtorët – u shua i qetë, i rrethuar nga të afërmit e tij,” thuhet në deklaratë.
Stilisti legjendar, i njohur si një ndër figurat më të mëdha të modës botërore, vazhdoi të punonte deri në ditët e fundit të jetës së tij, duke iu përkushtuar kompanisë, koleksioneve dhe projekteve të shumta.
Në komunikatën zyrtare, kompania thekson se “Giorgio Armani krijoi një vizion që e kaloi kufirin e modës, duke u shtrirë në çdo aspekt të jetës dhe duke i paraprirë kohës me qartësi dhe realizëm të jashtëzakonshëm. Ai udhëhiqej nga një kureshtje e pashtershme, nga vëmendja ndaj të tashmes dhe ndaj njerëzve. Në këtë rrugëtim krijoi një dialog të hapur me publikun, duke u bërë një figurë e dashur dhe e respektuar për aftësinë e tij për të komunikuar me të gjithë.”
Armani u shqua edhe për angazhimin e tij shoqëror, veçanërisht ndaj qytetit të tij të dashur, Milanos. Kompania që mban emrin e tij, tashmë me një histori prej 50 vitesh, është rritur mbi bazën e vizionit, durimit dhe pasionit të themeluesit. “Ai ka bërë gjithmonë të vetin pavarësinë e mendimit dhe veprimit, duke e bërë atë shenjë dalluese. Sot e përgjithmonë, kompania mbetet pasqyrë e këtij shpirti,” përfundon njoftimi.
Dhoma mortore do të hapet ditën e shtunë, më 6 shtator.
