GJKKO shtyu në 21 maj seancën gjyqësore ndaj kryebashkiakes së Roskovecit, Majlinda Bufi.
Zyrtarja vendore akuzohet për “përdorim të detyrës për veprimtari politike dhe zgjedhore”.
Shkak i shtyrjes u bë mungesa e Bufit, e cila përmes avokatit, paraqiti disa bileta udhëtimi, për të provuar se ndodhej disa ditë jashtë vendit, si e ftuar në një workshop.
“Për shkak se ndodhemi në fazën e konkluzioneve të mbrojtjes, e mbrojtura dëshiron të jetë e pranishme”, tha avokati i saj Klodian Skënderi.
Procesi ndaj Bufit është shtyrë disa herë, sa gjykata deklaroi se do ta konsiderojë mungesë vullneti mosparaqitjen e konkluzioneve nga ana e saj dhe do të shpallte vendimin. SPAK ka kërkuar më herët dënimin e Bufit me 1 vit burg, duke e konvertuar në 2 vjet shërbim prove.
