Një ngjarje e rëndë është shënuar në qytetin e Lushnjës, ku është gjetur i pajetë një 44-vjeçar, i cili ishte shpallur i zhdukur disa ditë më parë. Viktima, shtetasi F. Gj., u gjet i varur në një pemë në lagjen "Çlirimi", ku dyshohet se ka kryer vetëvrasje.
Sipas njoftimit zyrtar të Policisë së Lushnjës, më datë 21 gusht 2025, motra e tij kishte bërë kallëzim për largimin e tij nga banesa, çka çoi në shpalljen në kërkim të 44-vjeçarit.
"Specialistët për Hetimin e Krimeve të Komisariatit të Policisë Lushnjë referuan materialet në Prokurori, për vlerësim, pasi në lagjen 'Çlirimi', është gjetur, dyshohet i vetëvarur në një pemë, shtetasi F. Gj., 44 vjeç, i shpallur në kërkim në datë 21.08.2025", thuhet në njoftimin e policisë.
Grupi hetimor ndodhet në vendin e ngjarjes dhe po punon për zbardhjen e plotë të rrethanave. Ende nuk janë bërë të ditura shkaqet që mund ta kenë çuar 44-vjeçarin drejt këtij akti ekstrem.
