Gjykata e Shkallës së Parë të Juridiksionit të Përgjithshëm, Berat ka shpallur fajtor ish-kreun e Shërbimit Informativ Shtetëror, Aleksandër Shulla, dhe djalin e tij, Pandeli Shulla, për tre vepra penale, organizim të lojërave të fatit, mbajtje armësh pa leje dhe nxjerrje të sekretit shtetëror.
Aleksandër Shulla u dënua për “Organizimin ose ushtrimin e veprimtarive të lojërave të fatit në kundërshtim me ligjin”, ndërsa djali i tij, Pandeli Shulla, u shpall fajtor për “Mbajtje pa leje dhe prodhim armësh, armësh shpërthyese dhe municioni” dhe për “Tregim të sekretit shtetëror nga personi që i është besuar”.
Hetimet e nisura nga Prokuroria zbuluan se në një lokal në lagjen “30 Vjetori”, i menaxhuar nga Aleksandër Shulla, zhvilloheshin lojëra fati online. Pajisjet elektronike të përdorura për lojërat u verifikuan dhe u konstatua se funksiononin përmes një aplikacioni të lidhur me internetin.
Gjatë kontrollit në banesën e Pandeli Shullës u gjetën armë dhe municion të kalibrit 7.62 mm, si dhe dy USB që përmbanin materiale të klasifikuara si “sekret” dhe që administroheshin nga SHISH. Sipas Prokurorisë, marrja dhe kopjimi i këtyre materialeve përbën shkelje të sigurisë së informacionit të klasifikuar.
Në përfundim të gjykimit, Aleksandër Shulla u dënua me 2 vite burgim, që u ul me 1/3 sipas nenit 406 të Kodit Penal, duke rezultuar në 1 vit e 4 muaj burgim, i pezulluar me kusht për 2 vite e 8 muaj.
Pandeli Shulla u dënua me 6 muaj burgim për mbajtje armësh pa leje dhe 2 vite burgim për nxjerrje të sekretit shtetëror. Pas uljes së dënimit me 1/3, ai do të vuajë 1 vit e 4 muaj burgim, gjithashtu i pezulluar me kusht për 2 vite e 8 muaj. Gjykata vendosi gjithashtu t’i hiqet Pandeli Shullës e drejta për të ushtruar funksione publike për 5 vite.
