Ish-drejtori i Përgjithshëm i Burgjeve, Agim Ismaili, është paraqitur sot në ambientet e SPAK, në kuadër të hetimit për sulmin kibernetik ndaj sistemit kompjuterik të institucionit të drejtësisë.
Ismaili është nën hetim për veprat penale “Përgjimi i paligjshëm i të dhënave kompjuterike”, “Grupi i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”.
Sistemi kompjuterik i SPAK u sulmua më 12 mars, ndërsa ngjarja u zbulua disa ditë më vonë. Më 3 prill, SPAK njoftoi zyrtarisht se ishte vënë në shënjestër të një ndërhyrjeje të paligjshme në adresat e email-eve të prokurorëve të posaçëm. Në njoftim theksohej se nuk ishte arritur të depërtohej në sistemin e brendshëm të Strukturës së Posaçme.
Sipas SPAK, autorët kishin arritur të siguronin disa informacione, por pa mundur të kenë akses në dosje hetimore. Po ashtu, ishte tentuar ndërhyrja edhe në email-in e drejtuesit të Prokurorisë së Posaçme, Altin Dumani.
Në fazat e para të hetimit u identifikuan dhe u arrestuan dy persona: Zambak Gjoni, ish-drejtor i paraburgimit të Vlorës, dhe Arnold Rrokaj, ish-punonjës i Inspektoratit të Mbrojtjes së Territorit. Sipas dyshimeve, ata kanë shpërndarë të dhëna edhe te persona të tjerë, roli i të cilëve vijon të verifikohet.
Agim Ismaili është marrë i pandehur për hakerimin e serverave të SPAK në kuadër të një grupi kriminal, ndërsa dosja ndaj tij dhe dy zyrtarëve të tjerë, Arnold Rrokaj dhe Zambak Gjoni, pritet t’i dorëzohet për gjykim Gjykatës së Posaçme.
