Qeveria britanike planifikon të ndryshojë ligjin që t’i lejojë ministrat të dëbojnë çdo të dënuar të huaj që në momentin e shpalljes së dënimit me burg, si pjesë e masave për të adresuar krizën e mbipopullimit në burgje dhe shqetësimet e votuesve për emigracionin masiv.
Shabana Mahmood, sekretarja e drejtësisë, njoftoi se projektligji i ri për dënimet do të parashikojë dëbim të menjëhershëm për çdo të huaj të dënuar me burg, me përjashtim të atyre të shpallur fajtorë për vrasje, terrorizëm ose të dënuar me burgim të përjetshëm. Qeveria parashikon se rreth 3,000 të huaj do të dëbohen më herët nga sa lejon ligji aktual. Aktualisht, të huajt mund të dëbohen pas vuajtjes së gjysmës së dënimit – përqindje që nga shtatori pritet të bjerë në 30%.
Sipas ndryshimeve, të dënuarit e dëbuar nuk do të kenë të drejtë të rikthehen më në Mbretërinë e Bashkuar, edhe pse në vendet e tyre shumica do të lirohen. Mahmood e konsideron “internimin si formë dënimi” dhe anketimet e brendshme të qeverisë tregojnë se 80% e publikut mbështet këtë politikë.
Vendimi vjen mes shqetësimeve pas një sërë arrestimesh të azilkërkuesve dhe migrantëve të akuzuar për vepra seksuale e rrëmbime. Ndërkohë, opozita konservatore e quan masën të pamjaftueshme, duke kërkuar dëbimin e gjithë popullsisë së të burgosurve të huaj dhe kërcënimin me pezullim vizash për vendet që refuzojnë t’i pranojnë.
Në qershor, në burgjet e Anglisë dhe Uellsit ndodheshin 10,772 të huaj, ose 12% e të gjithë të burgosurve, prej të cilëve 1,731 për vepra seksuale dhe 3,250 për dhunë – shifra më e lartë që nga fillimi i regjistrimeve. Shqiptarët përbëjnë grupin më të madh (1,193), të ndjekur nga polakët dhe rumunët.
Kostoja vjetore për mbajtjen e një të burgosuri është rreth 54 mijë paund, çka i kushton taksapaguesve mbi gjysmë miliard paund në vit. Mahmood ka nisur edhe lirime të parakohshme për të shmangur mbipopullimin, ndërsa me hyrjen në fuqi të ligjit të ri, masa do të aplikohet edhe për të dënuarit aktualë.
“Mesazhi ynë është i qartë: nëse abuzoni me mikpritjen tonë dhe shkelni ligjin, do t’ju dërgojmë në shtëpi,” tha Mahmood.
