Pas arratisjes së të burgosurit Altin Ndoci nga Spitali Rajonal i Durrësit një ditë më parë, një incident tjetër ka ndodhur në Burgun e Sigurisë së Lartë të Burrelit.
Sipas një audioregjistrimi të publikuar në profilin e Instagramit të të dënuarit Fatmir Pjetri, i dënuar si pjesë e grupit të njohur si “Babagjyshët”, ai ka akuzuar Drejtorinë e Përgjithshme të Burgjeve për diskriminim. Pjetri pretendon se nuk i është lejuar të promovojë librin e tij, “Jetë e guximshme”, për shkak të përmbajtjes që përfshin akte dhune.
Pas publikimit të audioregjistrimit, Drejtoria e Burgut të Sigurisë së Lartë në Burrel ka urdhëruar një kontroll të imtësishëm të qelisë së Pjetrit, ndërsa dyshohet se audioregjistrimi është realizuar brenda qelisë me një aparat celular. Rezultatet e kontrollit priten të bëhen të ditura në orët në vijim.
