Ish-ministri i Shëndetësisë, Ilir Beqaj, i është drejtuar me një letër të hapur anëtarëve të Gjykatës Kushtetuese, duke kontestuar ashpër vendimin e fundit ku nuk e ndryshuan masën e tij të sigurisë dhe e lanë në qeli. Në një komunikim që ndërthur analizën teknike ligjore me nota politike, Beqaj akuzon gjykatën për anshmëri dhe "higjienizim" të arsyetimit, ndërsa krahason situatën e tij me liderë botërorë.
"Paragjykimi ndaj personalitetit": Referenca te Trump dhe Netanjahu
Beqaj ka goditur arsyetimin e Gjykatës se procedimet e tij të mëparshme penale ndikojnë negativisht në vlerësimin e personalitetit të tij. Ai e konsideron këtë një goditje ndaj prezumimit të pafajësisë, duke sjellë si shembull liderë ndërkombëtarë që kanë vijuar karrierën pavarësisht hetimeve.
"Benjamin Netanjahu ka procedime penale, por vazhdon të jetë kryeministër i Izraelit. Silvio Berlusconi kishte disa procedime penale dhe ishte kryeministër i Italisë. Donald Trump ishte nën procedim penal në fushatën presidenciale, por u zgjodh president i SHBA," shprehet Beqaj në letrën e tij, duke shtuar se: "Numri i procedimeve penale në mjedise politike të polarizuara nuk mund të përdoret mekanikisht si tregues negativ i personalitetit të individit."
Beteja për "Ligjin e BE": Ndjekje penale apo "zbatim i tërthortë"?
Përtej krahasimeve politike, ish-ministri ndalet te baza ligjore mbi të cilën është ngritur akuza, duke vënë në dyshim nëse rregulloret e Bashkimit Evropian mund të shërbejnë si bazë për dënim penal në Shqipëri. Ai e cilëson "absurd" argumentin e gjykatave të zakonshme për zbatimin e legjislacionit të huaj.
"Çfarë do të thotë... 'zbatimi në mënyrë të tërthortë i legjislacionit të Bashkimit Evropian është një realitet...' në një proces penal në Shqipëri? A jeni të vetëdijshëm se çfarë po legjitimoni? A është kushtetuese ndjekja penale për moszbatim të tërthortë të çdo lloj legjislacioni? Po legjislacioni i BE-së, a është burim i së drejtës penale në Shqipëri?" pyet Beqaj, duke akuzuar Gjykatën Kushtetuese se ka lejuar "ndjekjen penale pa ligj."
Nuk duhet të hetohen nga SPAK, "Nuk jam subjekt i posaçëm"
Një pikë kyçe e argumentit të tij lidhet me juridiksionin e SPAK-ut dhe Gjykatës së Posaçme. Beqaj pretendon se detyra e tij si Drejtor i SASPAC nuk e bën atë automatikisht një "funksionar të lartë" që duhet të gjykohet nga këto struktura, duke kërkuar që Gjykata Kushtetuese të vendosë kufij.
"A është subjekt i nenit 135, pika 2, të Kushtetutës... drejtori i përgjithshëm i një agjencie në varësi të Kryeministrit? Ju duhet t’u vini fre një herë e mirë ndjekjeve penale të paligjshme që SPAK nis për subjekte jo të posaçme," deklaron prerë ai, duke shtuar se as GJKKO e shkallës së parë nuk e ka gjetur atë si subjekt të nenit 260 të Kodit Penal.
Në mbyllje të letrës, ish-ministri e cilëson vendimin e Gjykatës Kushtetuese si një "hallkë tjetër në zinxhirin e padrejtësisë institucionale", duke paralajmëruar se këtë betejë do ta vijojë në Gjykatën Evropiane për të Drejtat e Njeriut në Strasburg.
