Të tjera detaje kanë dalë në dritë lidhur me ekzekutimin mafioz të Artur Bashimit në lagjen Agios Panteleimonas në Athinë. Momenti i vrasjes së 47-vjeçarit nga Gjirokastra është filmuar nga një kamera sigurie, e cila është këqyrur nga grupi hetimor.
Nga pamjet filmike rezulton se autori lëviz vetëm, i veshur me rroba të errëta, kaskë, xhup motorçiklete dhe doreza, në mënyrë që të mos lërë gjurmë. Referuar mediave greke rezulton se ai i afrohet Bashimit duke e qëlluar në gjoks. Ai tenton ta qëllojë përsëri, por arma i bllokohet. Policia deklaroi se gjeti në vendin e ngjarjes një gëzhojë të përdorur dhe një fishek të paqëlluar.
Sipas mediave greke, që iu referohen burimeve policore, ekzekutori ka pasur informacion për lëvizjet e viktimës dhe ka zgjedhur një pikë dhe kohë specifike për ta qëlluar për vdekje dhe përçjellë mesazhin e tij. Identiteti i tij mbetet i panjohur, por policia po e shqyrton videon kornizë për kornizë për ta gjetur atë.
Artur Bashimi ishte një personazh i njohur për autoritetet greke, pasi rezulton i skeduar si pjesë e një grupi kriminal që kryente vjedhje.
