Në Gjykatën e Posaçme u zhvillua seanca gjyqësore ndaj Bledar Polovinës dhe Amar Shkëmbit, dy të pandehurit e radhës të dyshuar për atentatin e 1 nëntorit 2019 ndaj automjetit të ish-prokurorit të Durrësit Arjan Ndoj, me 1 të vrarë dhe dy të plagosur. Gjatë seancës rezulton se është marrë informacion nga Interpol Tirana se i pandehuri Bledar Polovina është lokalizuar në SHBA. Autoritetet shqiptare i kanë dërguar autoriteteve amerikane kërkesën për ekstradimin e tij. Sipas shkresës së Interpolit rezulton se këta të fundit nuk kanë informacion se çfarë ka ndodhur me këtë proces.
Për faktin se Polovina i ka kërkuar gjykatës gjykim të shkurtuar nëpërmjet një e-mail të dërguar avokatit të tij Sajmir Visha. Por kërkesa nuk ka ardhur në formën e kërkuar nga ligji dhe për këtë arsye, sipas GJKKO nuk mund të pranohet. Avokati i Amar Shkëmbit kërkoi kohë që të njihet me aktet e dosjes pasi është zgjedhur vetëm një ditë më parë. Për këtë arsye seanca u shty për më datë 11 mars. Për atentatin te mbikalimi i Shkozetit ku u vra Andi Maloku, ndërsa mbetën të plagosur Arjan Ndoj dhe Aleksandër Laho, i njohur si Rrumi, një emër kontrovers është dënuar me burgim të përjetshëm Redian Rraja, nipi i ish-deputetit socialist Rrahman Rraja, në rolin e ekzekutorit dhe Ariol Halilaj si bashkëpunëtor. Disa të pandehur të tjerë janë dënuar me dënime më të lehta, ndërsa kreu i grupit kriminal Plarent Dervishaj, që dyshohet se urdhëroi krimin, po gjykohet bashkë me Julian Meçen në një proces të ndarë në GJKKO.
