Gilmando Dani mbeti i vrarë sot në një atentat me armë zjarri në rrethrrotullimin e Rinasit. Në ngjarje mbeti i plagosur edhe një person tjetër që ndodhej me të në makinë.
Dani është një nga emrat më të njohur të botës së krimit në Shqipëri, i cili vepronte për llogari të Emiliano Shullazit. Disa vite më parë është dënuar nga Gjykata për Krime të Rënda si pjesë e një grupi që vinte gjoba biznesmenëve në Tiranë, grup i cili drejtohej nga Emiliano Shullazi.
Ai la qelinë rreth një vit e gjysmë më parë, pasi kreu të gjithë dënimin e dhënë për pjesëmarrjen në këtë grup të strukturuar kriminal. Që nga koha kur Emiliano Shullazi ndodhet në burg, mësohet se Gilmando Dani kishte marrë drejtimin e grupit kriminal.
Dani kishte qenë objektiv i atentateve edhe më parë. Dy tentativat për ta vrarë ndodhën në vitet 2011 dhe 2015, ku në të dyja rastet ai mbeti i plagosur. Në nëntor të vitit 2018, Gilmando Dani u dënua me 12 vite burg si pjesë e grupit të Shullazit për akuzat e gjobëvënies dhe krijimit të një grupi të strukturuar kriminal. Ai u lirua më 6 tetor 2024.
