Zbulohen detaje të reja mbi atentatin që u regjistrua sot në Lushnjë ndaj 45-vjeçarit Juljan Sulo, i njohur me nofkën “Juli i Pashakos”, i cili mbeti i plagosur në këmbë si pasojë e të shtënave me armë zjarri.
Ngjarja ndodhi rreth orës 10:40 në bulevardin e Lushnjës, pranë kthesës së spitalit, një zonë mjaft e populluar e qytetit. 45-vjeçari po lëvizte i vetëm me automjetin e tij tip BMW, kur në një kryqëzim u qëllua me automatik nga një makinë tjetër, një “Nissan Qashqai” me targa greke.
Pas atentatit, autorët u larguan drejt zonës rurale dhe e dogjën mjetin në fshatin Lifaj. Më pas ata u zhvendosën me një automjet tjetër që i priste aty afër.
Ndërkohë, Sulo, i plagosur në këmbë, është shoqëruar nga policia për të dhënë sqarime lidhur me ngjarjen. Policia e Lushnjës dhe Drejtoria e Policisë Fier kanë ngritur postblloqe dhe kanë sekuestruar pamjet filmike nga kamerat e bizneseve përreth vendngjarjes. Në vendin e ngjarjes janë gjetur dhe sekuestruar gjithashtu shumë gëzhoja automatiku.
Grupi hetimor ka pyetur gjithashtu dëshmitarët që ndodheshin pranë vendit të ngjarjes për të mbledhur sa më shumë informacion mbi këtë atentat.
