Nuk ishte një plumb i shkrepur rastësisht, e as një aksident tragjik. Fatos Cenaj, 58 vjeç, u vra me paramendim. Ka një person të dyshuar për vrasje me dashje dhe hetuesit tashmë i kanë përjashtuar të gjitha pistat e tjera. Po ndiqet rruga e hakmarrjes, e cila lidhet me të kaluarën e tij, në kohën kur jetonte ende në Shqipëri.
Kështu e nis shkrimin e saj e përditshmja italiane "Il Mattino di Padova", që i ka kushtuar një artikull ngjarjes së rëndë, duke rrëzuar pistat e deritanishme të hetimit dhe duke u përqëndruar te një e re.
Këtë kthesë vendimtare në hetime e dhanë pamjet e kamerave të sigurisë së zonës dhe dëshmitë e atyre që e njihnin Fatosin. Karabinierët e Njësisë Hetimore të Komandës Provinciale të Padovës, të drejtuar nga prokurorja Maria d’Arpa, prej më shumë se dy muajsh po përpiqen të rindërtojnë ngjarjen e ndodhur më 8 qershor në rrugën Casoni Basse, në komunën e Fontanivas, ku Cenaj u gjet i plagosur rëndë dhe në agoni.
Atë mëngjes, 58-vjeçari, ish-oficer i burgjeve tashmë në pension, po bënte, si çdo ditë, rrugën nga shtëpia drejt manezhit mbi triciklin e tij, mjeti i vetëm që përdorte për të lëvizur. Pak minuta më vonë, një dëshmitar dëgjoi një të shtënë. Menjëherë pas kësaj, dy roje peshkimi e panë Fatosin të shtrirë në tokë. Fillimisht u mendua se ishte rrëzuar aksidentalisht. Por vetëm në spital mjekët zbuluan një plagë me armë zjarri në kokë. Pas tre ditësh lufte për jetën, ai ndërroi jetë.
Hetuesit, që në fillim, nisën të hetonin të kaluarën e Cenajt. Pas një karriere si oficer i burgjeve në Shqipëri, ai ishte zhvendosur në Itali për t’u ribashkuar me bashkëshorten dhe vajzën e tij. Prej dy vitesh banonte në Fontaniva, në një shtëpi që sot ka mbetur bosh. «Pas asaj që ndodhi, zgjodhën të shpërngulen tek një i afërm», tregonte një fqinjë. «Kishin frikë të qëndronin më aty».
Megjithatë, në jetën e përditshme në Fontaniva, Fatos Cenaj nuk jepte përshtypjen e një njeriu me armiq. Pronaria e manezhit pranë shtëpisë, ku ai punonte, e ka përshkruar gjithnjë si një njeri të thjeshtë e të mirë, që kryente punë të vogla dhe kujdesej me dashuri për kuajt. Nuk kërkonte asgjë, i mjaftonte të ndjehej i dobishëm.
Edhe në manezh, karabinierët janë rikthyer disa herë, në kërkim të gjurmëve ose provave të mundshme. Por nuk ka dalë në pah asnjë konflikt, kërcënim apo llogari e hapur që të lidhej me jetën e tij në Itali. Për këtë arsye, vëmendja e hetuesve mbetet e përqendruar te periudha kur ai jetonte në Shqipëri. Autoritetet italiane po bashkëpunojnë ngushtë me ato shqiptare për të rindërtuar të kaluarën e tij. Deri më tani janë marrë në pyetje familjarë, të njohur dhe banorë të zonës.
Hetimet vazhdojnë, por për hetuesit është tashmë e sigurt: Fatos Cenaj ka qenë viktimë e një vrasjeje të qëllimshme, të planifikuar me kujdes, dhe me shumë gjasa të lidhur me një hesap të vjetër të pambyllur.
