Prokuroria e Posaçme kundër Korrupsionit dhe Krimit të Organizuar, SPAK njoftioi të mërkurën më 22 tetor përfundimin e hetimeve ndaj 6 të pandehurve të akuzuar për “Ushtrim i ndikimit të paligjshëm ndaj personave që ushtrojnë funkisone publike”, “Korrupsion aktiv i dëshmitarit, i ekspertit ose përkthyesit” dhe “Shpërdorim i detyrës”. Mes gjashtë të pandehurve për të cilët kërkohet gjykimi, një është avokat dhe një tjetër punonjës policie.
SPAK bënë me dije se faktet penale në ngarkim të pandehurve janë zbuluar gjatë hetimeve të nisura në vitin 2019 në bashkëpunim me autoritetet e drejtësisë italiane për trafikun e lëndëve narkotike.
Avokati Armand Targaj akuzohet se ka përdorur aplikacionin SkyECC, nëpërmjet të cilit ka komunikuar dhe ndërmarrë veprime për personat në mbrojtjen e tij, duke ushtruar ndikim të paligjshëm ndaj funksionarëve publikë. Në një rast, Targaj akuzohet se ka konsumuar veprën penale “korrupsioni aktiv i dëshmitarit, i ekspertit ose përkthyesit”.
Ndërkohë, gjatë hetimeve të kryera për trafikun e drogës, nga përgjimet dhe vëzhgimet në ambjentet publike është një rast i kalimit të paligjshëm të kufirit nga ana e të pandehurit Edison Cukaj (Gjoka). Sipas SPAK, ndonëse Cukaj ishte në dijeni të faktit që nuk ishte në kushte të rregullta ligjore për kalimin e kufirit për të lëvizur në zonën ‘’Shengen’’, ka kontaktuar dhe është ndihmuar nga të pandehurit Ervis Deti, Serxhio Shkodra, dhe Bexhed Mema, të cilët dyshohet se i kanë kërkuar dhe marrë shumën tre mijë euro me qëllim ushtrimin e ndikimit të tyre tek punonjësi i policisë kufitare i pikës së kalimit kufitar të Portit Durrës, Naim Behluli. “Përmes ndikimit të ushtruar ndaj funksionarit publik dhe me vetëdije të plotë është realizuar kalimi i kufirit pa pengesa nga i pandehuri Edison Cukaj (Gjoka)”, citohet në njoftim.
Punonjësi i policisë kufitare, Naim Behluli është marrë i pandehur për “Shpërdorim detyre”, ndërsa katër të pandehurit e tjerë, për veprën penale “Ushtrimi i ndikimit të paligjshëm ndaj personave që ushtrojnë funksione publike”, kryer në bashkëpunim.
Sipas SPAK, hetimet vijojnë për identifikimin e personave të tjerë të përfshirë në këto veprimtari kriminale./BIRN/
