Prokuroria e Durrësit e cila po heton shkaqet e përmbytjeve në Durrës dhe rrethinat e tij, ku u shkaktua viktima e parë një punonjës i Ndërmarrjes Komunale Plazh si dhe miliona euro dëme materiale ka sekuestruar gjatë së hënës dokumentacionin që lidhet me procedurat e tenderimit dhe ndërtimit të hidrovorit të ri në Porto Romano me vlerë 19 milionë euro.
Lajmi konfirmohet nga burime pranë prokurorisë së Durrësit, e cila po heton për akuzat; “Shpërdorimi i detyrës”, “Shkatërrimi i pronës me përmbytje” dhe “Shkatërrimi i pronës nga pakujdesia”.
Nga hetimet e para ka dyshime se hidrovori i ri një vepër infrastrukturore e ndërtuar vitet e fundit nuk ka funksionuar dhe për pasojë janë shkaktuar dhe përmbytjet.
“Ka dyshime se nga personat e ngarkuar me funksione, të cilat kanë për detyrë menaxhimin e situatës janë kryer veprime ose mosveprime që përbëjnë mospërmbushje të rregullt të detyrës, duke dëmtuar rëndë interesat e shtetasve dhe personave juridikë dhe kanë sjellë edhe pasojat e rënda të evidentueshme dhe të matshme mbi të mirat pasurore si edhe në jetën e një personi i cili ka humbur jetën”, thekson Prokuroria. Në Durrës gjatë javës së përmbytjes humbi jetën dhe 54-vjecari Astrit Hysenaj, që kishte dalë në zonën e Plepave për të monitoruar situatën dhe u mor nga rredhja e ujit. Të paktën 1500 shtëpi dhe mijëra hektarë tokë bujqësore ishin nën pushtetin e ujit.
