Një ditë pas arrestimit të Nevzat Spahos, person i konsideruar kyç për atentatin ndaj biznesmenit Mondi Mëhalla në Elbasan, vazhdon të mos japë detaje mbi ecurinë e hetimeve. Deri më tani, asnjë nga të arrestuarit nuk ka pranuar të ofrojë informacion të vlefshëm për grupin hetimor.
Të premten pritet që para trupës gjykuese të dalin ish-ortaku i viktimës, Xhino Ago, si dhe roja i karburantit, Kujtim Pisha, të cilët do të njihen me masat e sigurisë. Pisha akuzohet për moskallëzim krimi dhe në një dëshmi paraprake është shprehur se nuk njoftoi policinë në kohë për shkak të frikës nga ngjarja.
Përveç Spahos, Agos dhe rojës Pisha, policia arrestoi edhe Naldo Gjinin nga Lezha, i cili ishte parë ditët e fundit duke lëvizur me një automjet tip “Audi”. Ky mjet dyshohet të jetë përdorur nga autorët në ekzekutimin e 43-vjeçarit dhe rezulton në pronësi të biznesit të viktimës, që ofronte makina me qira. Pas krimit, automjeti u gjet i djegur në fshatin Mirakë, ku u gjet edhe një armë zjarri.
Ndërkohë, në kërkim vazhdojnë të jenë Marselo Arani dhe Armando Kola, të dy të identifikuar nga policia si autorët e dyshuar të vrasjes së biznesmenit.
