Hakerat iranianë pretendojnë se kanë ndërmarrë një sulm kibernetik ndaj institucioneve më të larta të drejtësisë në Shqipëri. Sipas tyre, ata kanë depërtuar në sistemet e Gjykata e Lartë dhe Prokuroria e Përgjithshme.
Ata kanë shpërndarë mesazhe dhe linqe në rrjetin social Telegram, dhe grupi që e quan veten “Drejtësia e Atdheut” deklaron se “rrjetet kibernetike të sistemit gjyqësor shqiptar janë hakuar” dhe se “të gjitha dokumentet” ndodhen tashmë në zotërimin e tyre. Ata gjithashtu pretendojnë se sulmi është një përgjigje ndaj bashkëpunimit të autoriteteve shqiptare me organizatën iraniane Muxhahedinët e Popullit të Iranit (MEK), të cilën grupi e konsideron armiqësore.
Në një prej mesazheve thuhet se ky është “vetëm fillimi i një kapitulli të ri”, duke lënë të kuptohet për sulme të mëtejshme kibernetike.
Megjithatë, Gjykata e Lartë ka reaguar duke hedhur poshtë këto pretendime. Sipas burimeve zyrtare, sistemi i këtij institucioni nuk është komprometuar dhe nuk ka prova që të dhënat e tij të jenë cënuar.
Po ashtu edhe Prokuroria e Përgjithshme ka reaguar duke thënë se pas verifikimet të kryera nga ekspertët e sigurisë së IT-së, nuk kanë konstatuar asnjë gjurmë kompromentimi deri në këtë moment. “Stafet tona të IT-së janë duke monitoruar në mënyrë të vazhdueshme situatën”, njofton Prokuroria, duke theksuar se faqja dhe të dhënat e institucionit mbeten të sigurta.
