Autori i dyshuar i vrasjes së dyfishtë në Finikounda është arrestuar nga policia greke në banesën e tij në Kallithea. Megjithatë, ai deri më tani ka mohuar çdo përfshirje në ngjarjen e rëndë që tronditi Greqinë. Më herët, të martën në mëngjes, miku i tij 22-vjeçar iu dorëzua Byrosë Greke Kundër Korrupsionit, i shoqëruar nga avokati i tij, në lidhje me rastin e vrasjes së dyfishtë që ndodhi në kampingun e Finikoundës të dielën, më 5 tetor.
Sipas dëshmisë së të riut, një nga viktimat — pronari i kampingut — e kishte ngacmuar seksualisht në verën e vitit 2022, gjatë një vizite që ai kishte bërë në të njëjtin kamping. Avokati i 22-vjeçarit, Charalambos Lykoudis, foli për rastin, duke theksuar se nuk ka pasur asnjë motiv financiar për sulmin, as çështje trashëgimie, ndërsa vrasja ka qenë rezultat i një tentative për ta frikësuar viktimën.
“Qëllimi nuk ishte vrasja, por frikësimi dhe zhvatja e parave. Vrasja ndodhi spontanisht,” – u shpreh avokati.
Sipas tij, shoferi i motoçikletës nuk kishte asnjë lidhje me viktimën, ndryshe nga klienti i tij 22-vjeçar, i cili kishte pasur, siç e cilësoi ai, “një marrëdhënie personale dhe të dhimbshme” me pronarin e kampingut.
Avokati Lykoudis sqaroi gjithashtu se klienti i tij kishte bërë përpjekje për të frikësuar 68-vjeçarin me një pistoletë ajrore, pak para se të ndodhte vrasja, diçka që ai vetë e ka pranuar para autoriteteve.
“Ai erdhi vullnetarisht dhe u vu në dispozicion të drejtësisë. Është 22 vjeç, pa asnjë precedent penal. Nuk ka lidhje familjare apo motiv financiar.
Ai ishte pasagjer në motor gjatë incidentit, djali me pantallona të shkurtra që shihet në sediljen e pasme,” – deklaroi Lykoudis.
Si ndodhi vrasja e dyfishtë në kamping
Ngjarja ndodhi mbrëmjen e 5 tetorit 2025, në një kamping në Finikounda, ku autori, me fytyrë të mbuluar, hyri me forcë në recepsionin ku ndodhej pronari 68-vjeçar bashkë me kujdestarin e tij shqiptar 60-vjeçar dhe një mik të vjetër. Autori i armatosur qëlloi me gjakftohtësi drejt pronarit, duke e plagosur për vdekje, dhe më pas vrau mikun e tij që tentoi të arratisej nga vendngjarja. Në momentin e vrasjes së dyfishtë, në kamping ndodhej edhe nipi i pronarit, i cili arriti të shpëtonte duke u larguar nga vendi i krimit. Pas disa ditësh hetimesh intensive, policia greke identifikoi autorin dhe e arrestoi atë në banesën e tij në Kallithea, ndërsa hetimet vijojnë për zbardhjen e plotë të motivit dhe përfshirjes së bashkëpunëtorëve në ngjarjen tragjike që tronditi opinionin publik grek.
