Menjëherë pas arrestimit të tij, mediat greke kanë publikuar pamje tronditëse nga momenti i arrestimit të Pandeli Nakolecit, 40-vjeçarit shqiptar që tronditi opinionin publik me një akt makabër në Volos të Greqisë. Ai akuzohet për vrasjen brutale të bashkëshortes së tij 36-vjeçare, ngjarje e ndodhur në sy të katër fëmijëve të tyre të mitur.
Sipas raportimeve nga protothema.gr, arrestimi i Nakolecit ndodhi pasditen e së shtunës (23 gusht), ndërsa ai po qëndronte i fshehur vetëm 200 metra larg vendit të krimit. Policia greke arriti ta lokalizojë në rrugën Evripidou, në qendër të qytetit, ku ai ishte strehuar në një arë dhe kishte veshur rroba të gjetura në një kosh plehrash për të mos u identifikuar. Ai nuk kishte me vete as telefon celular, as ndonjë objekt tjetër që mund të ndihmonte në ndjekjen e tij.
Pamjet e publikuara tregojnë momentin kur oficerët e policisë ndërhyjnë dhe e ndalojnë 40-vjeçarin, i cili, sipas burimeve të mediave greke, është shfaqur i qetë dhe pa ndonjë shenjë pendese. Në fjalët e para pas arrestimit, ai ka thënë:
“Gruaja ime më tradhtonte, çfarë duhet të bëja unë?” – deklaratë kjo që ka shtuar edhe më shumë zemërimin e publikut grek dhe shqiptar.
Ngjarja ndodhi më 22 gusht, kur autori e goditi për vdekje me mjet prerës bashkëshorten e tij në banesën e tyre, në prani të fëmijëve, të cilët përjetuan një traumë të rëndë psikologjike. Pas krimit, Nakoleci u arratis dhe ishte në kërkim për më shumë se 24 orë, derisa u kap nga policia.
