Autoritetet britanike kanë arrestuar 40-vjeçarin Florant Nako, ish-drejtor banke, i kërkuar nga Interpol Tirana për disa episode vjedhjeje të ndodhura gjatë viteve 2018 dhe 2019 në degën ku ai punonte në Kombinat.
Sipas dokumenteve të gjykatës së ekstradimeve në Londër, Nako akuzohet se më 15 tetor 2018 ka përvetësuar 4,000 euro nga llogaria e klientit Nikolla Nika. Ai dyshohet gjithashtu se më 8 korrik 2019 ka tërhequr në mënyrë të paligjshme 1,300,000 lekë nga e njëjta llogari, ndërsa më 26 korrik 2019 ka marrë edhe 550,000 lekë të tjera, sërish në dëm të po të njëjtit klient.
Nako pritet të dalë sërish para gjykatës londineze më 11 nëntor 2025, ku do të shqyrtohet kërkesa për ekstradimin e tij në Shqipëri.
Në një njoftim të bërë publik në vitin 2020, Policia e Tiranës deklaronte:
“Finalizimi i operacionit u bë pas një hetimi katërmujor, pas denoncimit të bërë nga banka, ndërsa Nako kishte dhënë dorëheqjen nga posti. Florant Nako tashmë do të përballet me drejtësinë me akuzën ‘Vjedhja e kryer duke shpërdoruar detyrën’.”
Ndërkohë, banka reagoi duke theksuar:
“Që nga momenti i parë i konstatimit të incidentit, janë ndërmarrë të gjitha masat e duhura sipas procedurave të brendshme dhe kuadrit ligjor, duke bashkëpunuar ngushtë me organet kompetente për zbardhjen e çështjes dhe mbrojtjen maksimale të interesave të klientit.”
