Një ngjarje e rëndë është regjistruar këtë të premte në ujërat greke, ku një gomone që vinte nga brigjet shqiptare ka lëshuar sinjalin ndërkombëtar të emergjencës “SOS” pranë brigjeve të Greqisë. Sipas mediave greke, incidenti ka ndodhur në zonën detare midis Igumenicës dhe Korfuzit, në vendin e quajtur Prasoudi. Pas sinjalit të ndihmës, menjëherë drejt vendit të ngjarjes janë nisur mjetet lundruese të Policisë Kufitare të Korfuzit dhe Igumenicës, ndërsa njoftim për ndihmë është përcjellë edhe në Policinë Kufitare të Sarandës.
Në vendngjarje, autoritetet greke kanë gjetur një gomone gjysmë të fundosur dhe brenda saj drejtuesin, një shtetas shqiptar, i cili është identifikuar si Edmond Musa, 50 vjeç, me origjinë nga Saranda dhe i njohur me pseudonimin “Çimoni”. Sipas burimeve, ai është person i skeduar më parë për përfshirje në trafik ndërkombëtar të lëndëve narkotike.
Fillimisht, Musa është arrestuar për akuzat e “kalimit të paligjshëm të kufirit” dhe “mbytjes së mjetit lundrues”, ndërsa është transportuar në Portin e Igumenicës dhe më pas në Spitalin e Filatit për të marrë ndihmë mjekësore.
Megjithatë, pas dyshimeve të ngritura mbi aktivitetin e tij, policia greke është rikthyer në vendngjarje për një kontroll më të hollësishëm. Për shkak të rrymave detare, gomonia ishte zhvendosur pranë zonës së Sajadhës, ku gjatë kontrollit të detajuar u zbulua një sasi e madhe marijuane, e fshehur me kujdes në pjesët e brendshme të mjetit lundrues. Sipas mediave greke, lënda narkotike është sekuestruar dhe aktualisht po transportohet drejt Portit të Igumenicës, ku do të peshohet për të përcaktuar sasinë e drogës.
