Një gomone që vinte nga brigjet shqiptare ka dhënë sinjalin e emergjencës “SOS” pranë Korfuzit, duke vënë në lëvizje autoritetet greke dhe shqiptare. Mjeti lundrues u gjet gjysmë i fundosur në zonën Prasoudi, ku policia greke shpëtoi drejtuesin e saj, 50-vjeçarin nga Saranda, Edmond Musa, i njohur si “Çimoni”, me precedentë për trafik droge.
Fillimisht ai u arrestua për kalim të paligjshëm kufiri, por pas kontrolleve shtesë pranë Sajadhës, policia gjeti në gomone një sasi të madhe marijuane. Droga u sekuestrua dhe u transportua në portin e Igumenicës, ndërsa autoritetet e të dy vendeve kanë nisur hetime të përbashkëta për rrjetin e dyshuar të trafikut ndërkombëtar.
