Policia e Durrësit ka finalizuar operacionin policor të koduar “Storm 9”, i cili kishte si objektiv goditjen e një grupi kriminal të përfshirë në trafikimin e grave me qëllim shfrytëzimin për prostitucion. Në kuadër të këtij operacioni është shpallur në kërkim shtetasi D. G., 28 vjeç, me origjinë nga Kolumbia, i dyshuar si organizatori kryesor i veprimtarisë kriminale. Ky shtetas akuzohet për veprat penale “Trafikimi i personave të rritur” dhe “Shfrytëzimi i prostitucionit”.
Po gjatë operacionit, forcat policore kanë arrestuar në flagrancë dy shtetase kolumbiane, përkatësisht M. A. dhe Y. C., të dyja 24 vjeçe, të cilat kishin marrë me qira një apartament në lagjen nr. 18 të Durrësit, ku dyshohet se ushtronin prostitucion dhe shpërndanin lëndë narkotike. Të arrestuarat akuzohen për veprat penale “Prostitucion”, “Përshtatje e ambienteve për prostitucion” dhe “Prodhim dhe shitje të lëndëve narkotike”.
Gjithashtu, Policia ka nisur procedim penal edhe për pronarin e apartamentit, shtetasin V. R., 45 vjeç, banues në Durrës, për veprat penale “Fshehja e të ardhurave” dhe “Moskallëzimi i krimit”.
Në vijim të hetimeve janë proceduar penalisht edhe tre shtetas të tjerë, M. S., E. B. dhe A. H., për veprën penale “Prostitucioni”.
Gjatë kontrollit të ushtruar në apartamentin e përdorur për aktivitetin e paligjshëm, shërbimet e Policisë kanë sekuestruar një sasi lënde narkotike të dyshuar si cannabis sativa, një shumë parash të dyshuar si e përfituar nga prostitucioni, pesë aparate celulare dhe pasaportat e dy shtetaseve të arrestuara.
Policia e Durrësit bën me dije se hetimet po vijojnë për identifikimin dhe kapjen e organizatorit të shpallur në kërkim, si dhe për zbardhjen e plotë të rrjetit kriminal të përfshirë në këtë veprimtari të paligjshme.
