Një operacion i mirëorganizuar i zhvilluar në orët e vona të mbrëmjes së të martës, rreth orës 23:00, ka çuar në goditjen e një grupi të strukturuar kriminal që vepronte në fushën e trafikimit të lëndëve narkotike.
Aksioni u realizua nga Drejtoria Vendore e Policisë Elbasan, në bashkëpunim me Drejtorinë Vendore të Policisë Shkodër, dhe u finalizua me sukses pranë mesnatës.
Si rezultat i ndërhyrjes policore, tre persona u arrestuan në flagrancë. Gjatë kontrollit të automjetit me të cilin ata lëviznin, shërbimet e policisë sekuestruan rreth 45 kilogramë lëndë të dyshuar narkotike kanabis sativa, një armë zjarri luftarake me municion, një sasi të konsiderueshme parash, si dhe disa telefona celularë me karta SIM shqiptare dhe të huaja.
Sipas burimeve policore, operacioni u shoqërua me ndjekjen e automjetit që dyshohej se transportonte lëndën narkotike. Në hyrje të qytetit të Elbasanit, drejtuesi i mjetit, pasi ka konstatuar praninë e forcave të rendit, ka tentuar të largohej me shpejtësi, duke u futur në një rrugë të pandriçuar në një lagje periferike, por është neutralizuar nga policia.
Hetimet vijojnë për dokumentimin e plotë të veprimtarisë kriminale dhe për identifikimin e personave të tjerë të përfshirë.
