Zbardhet dëshmia e sekretares së Astrit Kalasë, para syve të të cilit u qëllua për vdekje gjyqtari në sallën e gjyqit. Ajo është shprehur se autori Elvis Shkëmbi pasi e qëlloi gjyqtarin Kalaja, është kthyer nga ajo ku është shprehur se “nuk ka gjë me të, dhe është kthyer nga gjyqtari dhe ka gjuajtur përsëri ndaj tij”.
Sekretarja gjithashtu është shprehur se, pasi Elvisi e ka qëlluar për herë të dytë gjyqtarin, ajo është ulur poshtë tavolinës dhe ka dëgjuar gjyqtarin, i cili rënkonte.
Gjyqtari Kalaja u ekzekutua nga sallën e gjyqit nga Elvis Shkambi, 30 vjeç. Xhaxhai i tij Gjon Shkambi është arrestuar po ashtu si nxitës në krim.
Dëshmia sekretares
Xh.K., me detyrë sekretare gjyqësore, në Gjykatën e Apelit të Juridiksionit të Përgjithshëm Tiranë, me gjyqtarin Astrit Kalaja, deklaron se në datë 06.10.2025, rreth orës 15:35-15:40, ka bërë thirrjen për hapjen e seancës gjyqësore të planifikuar për shpallje vendimi. Ka thërritur të gjitha palët në proces me mikrofon, dhe janë paraqitur vetëm katër persona, paditësi Ragip Kurtaj dhe një person që është prezantuar si djali i Ragipit, dhe dy persona nga pala e paditur, Gjon Shkambi dhe një person tjetër që e ka mësuar më vonë që quhej Elvis Shkambi, i cili shoqëronte Gjonin. Palët janë ulur dhe gjyqtari ka çelur seancën gjyqësore, ku ka thënë se seanca e mëparshme ishte shtyrë për shpallje vendimi. Gjyqtari ka pyetur Ragipin se kush është dhe i ka kërkuar të dorëzojë kartën ID. Ka ndërhyrë djali i Ragipit, por gjyqtari i ka thënë se ishte dëgjues dhe zotëria (Ragipi) mund të fliste vetë. Direkt pas kësaj gjyqtari ka shpallur vendimin ku është shprehur lënien në fuqi te vendimit të Gjykatës së Shkallës së Parë, ka cituar dhe afatet e rekursit në Gjykatën e Lartë dhe më pas seancën e ka deklaruar të mbyllur. Në këtë moment Ragip Kurtaj me djalin e tij kanë dalë të parët jashtë sallës. Në këtë moment gjyqtari është ngritur dhe është kthyer në krahun e tij të djathtë për të shkuar drejt dhomës së këshillimit, ndërkohë mesa mbante mend shtetasi Gjon Shkambi ka qenë tek dera duke dalë, dhe person që ka qenë me Gjonin, shtetasi Elvis Shkambi, është afruar para podiumit të gjyqtarit dhe ka gjuajtur me pistoletë. Ajo është ngritur në këmbë dhe ka vendosur duart në kraharor. Ky person është kthyer nga ajo ku është shprehur se nuk ka gjë me të, dhe është kthyer nga gjyqtari dhe ka gjuajtur përsëri ndaj tij. Pasi ka gjuajtur herën e dytë ndaj gjyqtarit ajo është ulur poshtë tavolinës ka dëgjuar gjyqtarin, i cili rënkonte, ku po në ato momente ka dëgjuar se është afruar një nëpunës i gjykatës, i cili ka funksionin roje salle, por jo i sallës së tyre, Bledar Panariti dhe ka pyetur “çfarë ka ndodhur”. Ajo është ngritur në këmbë dhe ka thënë se kanë vrarë gjyqtarin dhe ka parë gjyqtarin të shtrirë. Ka dalë në korridor ka bërtitur "njoftoni ambulance", ndërkohë i është afruar një punonjëse gjykatës dhe bashkë janë futur tek dhoma e këshillimit. Kjo punonjëse ka shkuar ka marrë një peshqir dhe ka ardhur përsëri ku me atë peshqir i kanë shtypur plagën që kishte gjyqtari në pjesën e ijës së majtë. Mban mend se gjyqtari ka qenë i shtrirë, gjysma e poshtme e trupit në sallën gjyqësore, gjysma e sipërme në dhomën e këshillimit. Pasi ka parë gjyqtarin ai nuk kishte asnjë reagim.
