Ka përfunduar sot seanca gjyqësore për vlerësimin e arrestit dhe caktimin e masës së sigurisë ndaj Xhension Toromenit, 25 vjeç, i akuzuar për vrasjen e fqinjit të tij, Besmir Kumria, 32 vjeç, ngjarje e ndodhur dy ditë më parë në fshatin Kryekuq të Divjakës. Seanca u drejtua nga gjyqtarja Aurora Tushe, e cila vendosi masën e sigurisë “arrest me burg pa afat”, duke e vlerësuar të ligjshëm arrestimin e 25-vjeçarit. Prokuroria, e përfaqësuar nga prokurori Kristi Jorgji, paraqiti akuzat e rënda ndaj Toromenit për veprat penale “vrasja me paramendim” dhe “mbajtja pa leje e armëve të ftohta”.
Sipas hetimeve paraprake, ngjarja ndodhi në ambientet e një lokali në fshatin Kryekuq, ku pas një debati të çastit, Toromeni dyshohet se e goditi me thikë fqinjit të tij, duke i shkaktuar vdekjen e menjëhershme. Burime bëjnë me dije se konflikti mes dy fqinjëve ka zanafillën rreth dy vite më parë, kur gjatë një debati për ujin e kanalit vaditës, viktima kishte qëlluar me shuplakë babain e Toromenit. Kjo ngjarje e mbetur e pazgjidhur dyshohet se ka çuar në aktin e rëndë kriminal.
Pas kryerjes së krimit, autori u largua nga vendngjarja, por u arrestua nga policia pak orë më vonë, gjatë arratisë. Në momentin e ndalimit, ai mësohet të ketë deklaruar para uniformave blu se veprimi i tij ishte i nxitur nga dëshira për hakmarrje ndaj fyerjes dhe dhunës së dikurshme ndaj babait të tij.
