Gjykata e Athinës shpalli sot vendimin përfundimtar ndaj shtetasit shqiptar Eduard Danaj, 52 vjeç, i cili u shpall fajtor për vrasjen me paramendim të bashkëshortes së tij, Enkelejda Danaj, 40 vjeçe, ngjarje e ndodhur më 16 maj 2024 në Menidi të Athinës. Sipas vendimit të trupit gjykues, Danaj u dënua me burgim të përjetshëm, si dhe me pesë vjet burg shtesë dhe një gjobë prej 5,000 eurosh për posedim dhe përdorim të paligjshëm të armës së krimit. Gjykata e cilësoi aktin si një vrasje të qëllimshme, me mizori të veçantë dhe të kryer nën ndikimin e xhelozisë dhe ndjenjës së pronësisë ndaj bashkëshortes.
Pas kryerjes së krimit, i pandehuri u largua nga vendngjarja dhe qëndroi në një hotel në Athinë, ku u arrestua disa orë më pas. Gjatë arrestimit, ai i tha policit që e shoqëroi: “Ia bëra mirë asaj.”
“Një akt dhune dhe mizorie të veçantë”
Gjatë shpalljes së vendimit, kryetari i trupit gjykues theksoi se: “Akti i vrasjes është një akt dhune dhe mizorie i veçantë. Kemi një thikë të ngulur në stomakun e viktimës. I pandehuri është një njeri i dhunshëm dhe apatik; ai nuk mbante mend as datat e lindjes së fëmijëve të tij, gjë që është e pakonceptueshme. Ai veproi me paramendim dhe qetësi të plotë.”
Gjykata hodhi poshtë pretendimet e mbrojtjes se Danaj kishte qenë nën ndikimin e alkoolit gjatë aktit të vrasjes, duke sqaruar se ai kishte konsumuar pije pas krimit dhe jo para tij.
Ngjarja tragjike
Sipas dosjes gjyqësore, mëngjesin e 16 majit 2024, ndërtuesi 52-vjeçar kishte shkuar në banesën e Enkelejdës, e cila ishte nisur për në punë. Ai e kishte sulmuar me thikë, duke e goditur më shumë se 14 herë, ndërsa gruaja vdiq në vend nga plagët e marra.
Dëshmia tronditëse e vajzës
Në sallën e gjyqit, vajza 22-vjeçare e çiftit, e cila pas vrasjes ka marrë përsipër rritjen e vëllait të vogël, dëshmoi e tronditur, pa e parë asnjëherë në sy babain e saj. “Kam folur vetëm një herë me të. Ai më kërkoi falje, por pastaj filloi ta mallkonte nënën. Ai nuk është penduar kurrë për atë që ka bërë,” tha ajo.
Ajo rrëfeu se dhuna në familje kishte qenë e përsëritur ndër vite, duke treguar se e ëma shpesh vinte në shkollë me gërvishtje dhe plagë në trup.
“Ai e rrihte gjatë gjithë kohës. Ishte xheloz dhe e kontrollonte çdo hap të saj. I thoshte: ‘Do të të vras, do të jemi bashkë në jetë a në vdekje.’”
Vajza kujtoi se prindërit e saj ishin divorcuar kur ajo ishte 14 vjeç, por më pas nëna e saj e kishte pranuar sërish në shtëpi pas trajtimeve që ai kishte bërë për alkoolizmin.
"Unë nuk doja që ai të kthehej. Kisha frikë se do të ndodhte e njëjta gjë. Dhe ndodhi.”
Në dëshminë e saj, ajo shtoi se i ati i kishte përndjekur dhe kërcënuar edhe pas ndarjes, duke i telefonuar dhe ndjekur lëvizjet e tyre.
Në gjyq dëshmoi edhe vëllai i Enkelejdës, i cili përshkroi një tablo të gjatë të dhunës së ushtruar nga Danaj.
“E konsideronte motrën time pronë të tij. Gjithmonë kishte grindje. Njëherë ia futi kokën në gëlqere. Jetonim pranë për ta mbrojtur. Fëmijët shpesh i gjenim të fshehur pas divaneve.” Sipas tij, Enkeleda kishte vendosur të ribashkohej me të për hir të fëmijëve, por dhuna kishte rifilluar menjëherë.
“Ky burrë ishte i keq gjithë jetën e tij. Ai nuk donte ta shihte askënd të ecte përpara. Nuk ishte pirja faji, por natyra e tij. I kishte thënë motrës shumë herë: ‘Nëse divorcohemi, do të të vras.’”
Mbrojtja e pandehurit
Gjatë fjalës së tij në gjyq, Eduard Danaj deklaroi se e kishte dashur shumë gruan dhe se nuk mbante mend asgjë nga dita e krimit, duke pretenduar se kishte qenë i dehur.
“E doja shumë. Nuk e kuptoj si ndodhi. Pas dy ditësh thashë ‘çfarë kam bërë?’. Nuk e di si e vrava gruan time,” tha ai me qetësi.
Ai pranoi se kishte pasur grindje të shpeshta me bashkëshorten, por mohoi se e kishte goditur ndonjëherë më parë. Gjykata dhe prokuroria nuk e pranuan këtë pretendim, duke kujtuar se në vitin 2013 ai e kishte kërcënuar Enkelejdën me thikë dhe ishte denoncuar për dhunë në familje.
Fjalët e fundit të prokurores
Në fjalën e saj, prokurorja e çështjes theksoi se i pandehuri kishte vepruar me vetëdije të plotë dhe me qëllim për të vrarë bashkëshorten e tij.
“Motivi i tij ishte xhelozia dhe ndjenja e pronësisë. Ai nuk mund ta pranonte që ajo kishte filluar një jetë të re. Vrasja ishte e paramenduar dhe e kryer me qetësi, jo në gjendje të turbullt mendore apo nën efektin e alkoolit,” deklaroi prokurorja, duke kërkuar dënimin maksimal.
Gjykata pranoi plotësisht kërkesën e saj, duke shpallur fajtor Eduard Danajn për vrasje me paramendim, posedim dhe përdorim të paligjshëm të armës, dhe duke e dënuar me burgim të përjetshëm.
Ky vendim mbyll një nga rastet më tronditëse të dhunës në familje të regjistruara në Greqi vitet e fundit — një krim që shkatërroi një familje dhe la pas dy fëmijë pa nënë.
