Gjykata e Posaçme kundër Korrupsionit dhe Krimit të Organizuar (GJKKO) ka shpallur sot vendimin përfundimtar ndaj të pandehurit Shkëlzen Daci, i akuzuar për trafik narkotikësh dhe pjesëmarrje në një grup të strukturuar kriminal. Procesi gjyqësor u zhvillua me procedurën e gjykimit të shkurtuar, pas kërkesës së paraqitur nga Prokuroria e Posaçme kundër Korrupsionit dhe Krimit të Organizuar (SPAK), në kuadër të procedimit penal nr. 36/2 të vitit 2019 (me origjinë nga procedimi nr. 238 i vitit 2017).
Në përfundim të shqyrtimit gjyqësor, trupi gjykues i përbërë nga gjyqtarët Alfred Konomi, Sokol Pasho dhe Migena Laska, me vendimin nr. 60, datë 29.09.2025, vendosi si më poshtë:
Deklarimin fajtor të të pandehurit Shkëlzen Daci për kryerjen e veprës penale “Trafikim i lëndëve narkotike, në bashkëpunim në kuadër të grupit të strukturuar kriminal”, parashikuar nga nenet 283/a/1 dhe 28/4 të Kodit Penal, si dhe në bazë të nenit 334/1 të Kodit Penal, duke e dënuar atë me 12 (dymbëdhjetë) vite burgim.
Deklarimin fajtor të të pandehurit Shkëlzen Daci për veprën penale “Grupi i strukturuar kriminal”, të parashikuar nga neni 333/a/2 i Kodit Penal, duke e dënuar atë me 3 (tre) vite burgim.
Në bazë të nenit 55 të Kodit Penal, gjykata vendosi që dënimet të bashkohen dhe i pandehuri të vuajë një dënim të vetëm prej 12 (dymbëdhjetë) vite burgim.
Në aplikim të nenit 406/1 të Kodit të Procedurës Penale, për shkak të gjykimit të shkurtuar, gjykata uli me 1/3 masën e dënimit, duke përcaktuar që i pandehuri Shkëlzen Daci të vuajë 8 (tetë) vite burgim.
Në bazë të nenit 14 të ligjit nr. 8328, datë 16.04.1998 “Për të drejtat dhe trajtimin e të dënuarve me burgim dhe të paraburgosur”, i ndryshuar, gjykata vendosi që i pandehuri të vuajë dënimin në burgun e sigurisë së lartë.
Shpenzimet proceduriale iu ngarkuan të pandehurit.
Për ekzekutimin e këtij vendimi, gjykata ngarkoi Prokurorinë e Posaçme kundër Korrupsionit dhe Krimit të Organizuar (SPAK).
Gjykata bëri me dije gjithashtu se ndaj këtij vendimi lejohet ankim brenda afatit ligjor prej 15 (pesëmbëdhjetë) ditësh në Gjykatën e Posaçme të Apelit për Korrupsionin dhe Krimin e Organizuar, duke filluar ky afat nga dita e nesërme e njoftimit të vendimit.
