Gjykata e Posaçme ndryshoi masën e sigurisë për Redi Mollën. Nga arrest në burg ish-zyrtari i lartë i Bashkisë u dërgua në masën e arrestit në shtëpi. Gjykata e zbuti masën e sigurisë për të për arsye shëndetësore.
Redi Molla dhe Mariglen Qato janë dy ish-drejtorët e Bashkisë të cilët akuzohen për korrupsion, pastrim parash e fshehje pasurie. Sipas SPAK ata janë pronarët faktikë të kompanisë 5D e cila fitonte tendera pranë Bashkisë së Tiranës.
Bashkë me ta po gjykohen edhe disa zyrtarë të tjerë të Bashkisë. Ndërsa kreu i saj Erion Veliaj ndodhet në paraburgim dhe është zyrtarisht i pandehur për 13 akuza penale.
KOMUNIKIM PËR MEDIAN
Gjykata e Posaçme e Apelit për Korrupsionin dhe Krimin e Organizuar, me trup gjykues monokratik të përbërë nga gjyqtare Iliriana Olldashi, sot më 10.10.2025, shpalli vendimin mbi çështjen penale nr. 188 akti, datë 01.09.2025 regjistrimi, mbi ankimin e personit nën hetim R.M., me objekt: “Ankim ndaj vendimit nr. 531, datë 31.07.2025 të Gjykatës së Posaçme të Shkallës së Parë për Korrupsionin dhe Krimin e Organizuar, me objekt: Zëvendësim mase sigurimi” dhe vendosi:
Ndryshimin e vendimit nr. 531, datë 31.07.2025 të Gjykatës së Posaçme të Shkallës së Parë për Korrupsionin e Krimin e Organizuar, si më poshtë:
Zëvendësimin e masës së sigurimit personal “Arrest në burg” të caktuar ndaj të pandehurit R.M., me vendimin nr. 28, datë 28.03.2024 të Gjykatës së Posaçme të Shkallës së Parë për Korrupsionin e Krimin e Organizuar, me masën e sigurimit “Arrest në shtëpi” të parashikuar nga neni 237 i K.Pr.Penale, duke urdhëruar të pandehurin R.M., të mos largohet nga banesa e tij e ndodhur në adresën: ***.
Urdhërohet lirimi nga ambientet e paraburgimit i të pandehurit R.M., në rast se nuk mbahet për ndonjë shkak tjetër.
Ngarkohet Prokuroria e Posaçme kundër Korrupsionit dhe Krimit të Organizuar për ekzekutimin e këtij vendimi dhe kontrollimin në bashkëpunim me policinë gjyqësore, të zbatimit të urdhërimit të dhënë të pandehurit, nga kjo gjykatë.
U shpall sot në Tiranë, më datë 10.10.2025.
