Kompania Gener 2 në pronësi te Bashkim Ulaj ka dënuar me forcë ngjarjet e ndodhura sot në Rrjoll, duke i cilësuar ato si një akt të rëndë dhune ndaj rendit dhe ligjit në Shqipëri.
Sipas deklaratës së kompanisë, persona të paautorizuar kanë hyrë me forcë në kantier, kanë ushtruar dhunë fizike ndaj punonjësve, kanë rrahur persona të pranishëm si dhe kanë thyer pajisje pune dhe dëmtuar makineri.
Gener 2 e cilëson këtë si një sulm kriminal që cenon jo vetëm një investim privat dhe klimën e investimeve në vend, por krijon një precedent të rrezikshëm, ku – sipas saj – dhuna zëvendëson vendimet e gjykatave dhe turmat vendosin mbi institucionet.
Në reagim, kompania shpreh shqetësim për mungesën e reagimit parandalues nga organet përgjegjëse, konkretisht Prokuroria e Shkodrës, duke pretenduar se ajo ka qenë në dijeni të tensioneve në zonë, por nuk ka ndërmarrë veprime për të shmangur përshkallëzimin.
Gjithashtu, Gener 2 akuzon disa portale dhe politikanë për nxitje të klimës së konfliktit, duke i cilësuar si faktorë që kanë ushqyer tensionet për interesa të caktuara.
Kompania i bën thirrje Policisë së Shtetit dhe organeve të drejtësisë të identifikojnë autorët, organizatorët dhe nxitësit e dhunës dhe t’i vënë përpara përgjegjësisë ligjore pa tolerancë. Njëkohësisht, i kërkon Inspektoratit të Lartë të Drejtësisë të shqyrtojë veprimet dhe mosveprimet e prokurorëve në këtë çështje.
Në fund, Gener 2 i kërkon qeverisë të garantojë sigurinë e investimeve të ligjshme dhe u bën thirrje forcave politike të mos inkurajojnë dhunën, duke theksuar se projekti do të vijojë në përputhje me ligjin, pavarësisht situatës së krijuar.
