Ka përfunduar procesi i vettingut dhe kontrolli i pastërtisë së figurës për 7 kandidatët që garojnë për postin e kreut të Byrosë Kombëtare të Hetimit. Rezultatet i janë dërguar komisionit përzgjedhës, i përbërë nga Altin Dumani, kreu i SPAK, si edhe prokurorët Arben Kraja dhe Behar Dibra.
Në garë për drejtor të BKH janë 7 kandidatë, Andi Pogaçe, Artur Beu, Elton Kërluku, Gentian Ndoi, Gentjan Shehaj, Gledis Nano dhe Joni Keta. Komisioni do të shqyrtojë rezultatet përfundimtare të Komisionit të Posaçëm të Vettingut dhe më pas do të hartojë renditjen zyrtare të kandidatëve.
Pas këtij procesi, treshja e prokurorëve do t’i dërgojë Këshillit të Lartë të Prokurorisë një emër për miratim si drejtuesin e ri të Byrosë Kombëtare të Hetimit.
