Kryetari i Kuvendit, Niko Peleshi, ka reaguar pas skandalit të fundit që tronditi institucionin më të lartë ligjvënës në vend, ku në një dokument zyrtar përkujtoheshin figura kombëtare shqiptare të muajit tetor, mes të cilëve edhe diktatori Enver Hoxha.
Pas valës së reagimeve publike dhe kritikave të forta nga shoqëria civile dhe media, Peleshi u detyrua të kërkonte ndjesë në hapje të seancës parlamentare. Megjithatë, ndjesa u shoqërua me një justifikim që kishte dhe një gënjeshtër.
“Dua të shpreh ndjesë dhe keqardhje për keqkuptimin e krijuar. Teksti ishte informativ, jo për të mbrojtur apo vlerësuar dikë. Ai është nxjerrë pa interpretim; Hoxha është përmendur vetëm me ditëlindje. I kërkova Institutit Parlamentar një rishikim të plotë për të shmangur çdo keqinterpretim në të ardhmen”, deklaroi Peleshi.
Por e vërteta është se në dokumentin e titulluar “Figurat Kombëtare (Tetor)” nuk përmendte vetëm datën e lindjes së Hoxhës, por i dedikonte atij një përshkrim të plotë biografik.
Dokumenti, i përgatitur nga Instituti Parlamentar, rendiste Hoxhën përkrah personaliteteve të historisë shqiptare si Sulejman Delvina, At Shtjefën Gjeçovi, At Gjergj Fishta, Abdyl e Naim Frashëri, dhe Mbretit Zog I. Në përshkrimin për Hoxhën, ai cilësohej si “Hero i Popullit” dhe “Hero i Punës Socialiste”, ndërsa biografia e tij përfshinte rolin si udhëheqës i shtetit shqiptar dhe i Partisë Komuniste (më pas Partia e Punës).
