Fredi Beleri nuk i ndahet ish-ministres së Jashtme Olta Xhaçka. Pasi Gjykata e Posaçme dhe më pas Apeli vendosi mosfillimin e procedimit penal për Xhaçkën, ish-kryetari i zgjedhur i Bashkisë së Himarës, Beleri vendosi t’i drejtohet Gjykatës së Lartë me rekurs. Ai kërkon shfuqizimin e dy vendimeve të dy gjykatave të Posaçme dhe urdhërimin e SPAK që të hetojë ish-ministren. Beleri e kallëzoi Xhaçkën dhe bashkëshortin e saj ish-deputetin socialist Artan Gaçi për disa bëra penale, teksa vetë ndodhej në burg nën dyshimet për blerje votash. SPAK vendosi mosfillimin e procedimit për çiftin e bashkëshortëve, ndërsa mori të pandehur për shfrytëzim detyre ish-kryebashkiakun e Himarës Jorgo Goro, lidhur me tjetërsimin e dy sipërfaqeve të tokës mbi të cilat Artan Gaçi mori statusin e investitorit strategjik. Rekursi i Belerit do të shqyrtohet nga kolegji i përbërë nga Ilir Panda, Sokol Binaj dhe Sandër Simoni. Çështja do të shqyrtohet në dhomë këshillimi në një seancë të datës 21 tetor 2025.
