Drejtori i Përgjithshëm i Policisë, Ilir Proda, sot ka shpërndarë një tjetër fletë lavdërimi, këtë herë për efektivin Klajdi Mustaj, i cili shpëtoi tre persona nga një aksident rrugor. Një akt njerëzor i vërtetë nga një punonjës policie – por edhe një rast i artë për drejtorin që të dalë në media.
Sepse kur bëhet fjalë për foto, fjalime dhe certifikata, Ilir Proda kujtohet. Por kur bëhet fjalë për problemet e vërteta të trupës policore, për kushtet, mbështetjen dhe profesionalizmin që ata kanë realisht nevojë, apo për të shpjeguar pse Policia e Shtetit ka bllokuar prej tre ditësh ambientet e një televizioni kombëtar si News24 – aty bie një heshtje e plotë. Asnjë fjalë, asnjë sqarim, asnjë përgjegjësi.
Policia sot ka nevojë për kujdes dhe drejtim serioz, jo për certifikata që vlejnë vetëm si dekor për kamerat. Por me sa duket, për Ilir Prodën, propaganda ka më shumë vlerë se faktet. Dhe fletët e lavdërimit nuk mbushin boshllëqet e një institucioni që shpërndan “mirënjohje”, por nuk merr guximin të flasë për gjendjen ku ndodhet policia e shtetit.
