Një video e publikuar së fundmi ka nxitur reagime të forta, pasi shfaq disa të burgosur duke festuar me alkool në qelinë e burgut të Durrësit, në kundërshtim me rregullat e sigurisë.
Pamjet janë bërë publike nga gazetari Flamur Vezaj, ku dallohet një grup personash me precedentë kriminalë, të cilët ndodhen në një qeli që, sipas tij, i përket një burgu të sigurisë së lartë në vend. Në video, të burgosurit shfaqen duke konsumuar pije alkoolike, duke dëgjuar muzikë me volum të lartë dhe duke përdorur telefona celularë, ndërkohë që disa prej tyre komunikojnë përmes videothirrjeve.
Në sfond vërehen gjithashtu pajisje elektronike, përfshirë një televizor, ndërsa një numër i konsiderueshëm personash janë të grumbulluar në të njëjtin ambient, duke festuar dhe filmuar.
Pas publikimit të pamjeve, ka reaguar Drejtoria e Përgjithshme e Burgjeve, e cila sqaron se videoja është regjistruar përpara muajit janar në IEVP Durrës. Sipas institucionit, një pjesë e personave të shfaqur janë identifikuar dhe disa prej tyre rezultojnë të jenë transferuar ose liruar më herët.
Autoritetet bëjnë me dije se situata aktuale nuk është ajo që paraqitet në video, ndërsa menjëherë pas publikimit të saj është angazhuar Shërbimi i Kontrollit të Brendshëm në Sistemin e Burgjeve, i cili ka nisur një hetim të plotë administrativ dhe penal. Hetimi përfshin jo vetëm të burgosurit e identifikuar, por edhe verifikimin e zinxhirit komandues në institucion, me qëllim përcaktimin e përgjegjësive në çdo nivel drejtues.
Ndërkohë, kontrollet në institucionet penitenciare janë intensifikuar. Gjatë veprimeve të fundit në IEVP Durrës janë sekuestruar tre telefona celularë, ndërsa personat e përfshirë janë vendosur në masa disiplinore dhe po përballen me procedim penal.
