Familjarët e 54-vjeçarit Astrit Hysenaj, që mbeti viktimë e përmbytjeve në Durrës, kanë hedhur poshtë pretendimet e Bashkisë se viktima kishte lënë punën herët për shkak të motit të keq dhe po kthehej në banesë në momentin kur u mor nga rrjedha e ujit dhe ra në kanal.
Ata shprehen se Astrit Hysenaj kishte shkuar në punë në orën 5:30 të mëngjesit, ashtu si çdo ditë, pavarësisht kushteve të vështira atmosferike, dhe se ka qenë në krye të detyrës deri në momentet e fundit të jetës.
“Daja u nis në punë në 5.30 si normalisht. Familja tentoi ta ndalojë për shkak të situatës, por ai shkoi. Shqetësimi ynë nisi pasi nuk u kthye në punë dhe bëmë denoncimin. Pamë nga kamerat se deri në 8.25 ka qenë duke punuar te mbikalimi i Plepave”, u shpreh mbesa e të ndjerit, Klodiana Bërsheni.
Familjarët kërkojnë që çdo pamje filmike që mund të ekzistojë pas kësaj ore të bëhet publike, duke theksuar se viktima nuk e ka braktisur vendin e punës.
“Deri në momentin e fundit të jetës ka qenë në krye të detyrës. Nëse diku ka ndonjë pamje filmike pas kësaj ore, le t’i vënë në dispozicion”, tha Osman Hysenaj, djali i xhaxhait të viktimës.
Sipas të afërmve, kanali ku Astrit Hysenaj u gjet pa jetë ndodhet pranë vendit ku ai është parë për herë të fundit, çka sipas tyre përputhet me rrjedhën e ujit gjatë përmbytjeve.
“Kanali ku ka rënë është pranë vendit ku është parë për herë të fundit dhe rrjedha e ujit, kur të merr, të nxjerr aty ku u gjet. Nuk mund të përbaltet figura e tij duke thënë se nuk ka qenë në punë. Kërkojmë respekt për figurën e tij”, tha ndër të tjera mbesa e tij, Klodiana.
Pamjet filmike, sipas familjarëve, janë vënë në dispozicion të policisë për hetime të mëtejshme. Ata kërkojnë gjithashtu mbështetje ekonomike për familjen e viktimës, pasi Astrit Hysenaj ishte i vetmi që siguronte të ardhura. Në xhepin e tij, policia gjeti 10 mijë lekë të vjetra.
Të afërmit theksojnë se nuk fajësojnë askënd për ngjarjen e rëndë, por kundërshtojnë kategorikisht pretendimin se Hysenaj nuk ndodhej në punë në momentin e fatkeqësisë, duke e përshkruar atë si një njeri dhe punonjës korrekt e të përkushtuar ndaj detyrës.
