Mariza Kola, motra e 34-vjeçarit Kristian Kola, i cili u ekzekutua ditët e fundit në qendër të Shkodrës, shpreh dhimbjen dhe pasigurinë që po përjeton familja pas kësaj ngjarjeje tragjike.
Ajo rrëfeu se lajmin e trishtë e ka marrë përmes telefonit nga shoqëria, që i ka thënë se vëllai i saj është vrarë. “Më mori shoqëria dhe më dha lajmin,” tha ajo me lot në sy, duke mbajtur vello zie.
Mariza hodhi poshtë çdo aludim për përfshirje të vëllait në ndonjë konflikt, dhe tregoi bisedën e fundit që kishte pasur me të. “Një ditë para vrasjes kam folur me të. Kam pritur të flisja edhe në darkë, por s’munda. Ai nuk kishte asnjë problem, gjithmonë fliste me mua ose me babain. Nuk dimë asgjë, nuk kanë thënë asgjë,” tha ajo, duke shtuar se nuk është e lehtë të përballesh me humbjen e një të dashuri.
Në anën tjetër, Mariza denoncoi mungesën e transparencës dhe vonesat në reagimin e institucioneve pas ngjarjes. Ajo theksoi se familja nuk është marrë në pyetje nga policia dhe se babait të Kristianit nuk i është lejuar të shoqëronte trupin gjatë transportimit. “Ambulanca u vonua për një orë për të shkuar, ndërsa gjithë Shkodra do ta merrte vrap për ta ndihmuar,” tha ajo në Euronews, duke shprehur dyshime mbi menaxhimin e situatës nga autoritetet.
Familja kërkon drejtësi dhe përgjigje për rrethanat e vrasjes, ndërsa hetimet vazhdojnë. “Nuk ka pasur asnjë konflikt, ai punonte me babain. Duam drejtësi, ia lëmë në dorë drejtësisë,” përfundoi motra e Kristian Kolës, teksa lotët nuk i kursente.
