Drejtoresha e Korporata Shqiptare e Investimeve, Elira Kokona, është thirrur nga Prokuroria e Tiranës për të dhënë shpjegime lidhur me një kallëzim penal të paraqitur ndaj saj. Sipas burimeve, ajo pritet të japë sqarime në cilësinë e personit në dijeni, ndërsa ecuria e çështjes do të përcaktohet në varësi të hetimeve.
Fletëthirrja është firmosur nga prokurori i çështjes Dritan Nushi. Në kuadër të të njëjtit procedim pritet të pyeten edhe pjesëtarë të tjerë të kabinetit të kryeministrit Edi Rama, mes tyre Enkelejd Musabelliu, Kastriot Gurra, Enkelejda Muçaj dhe Ermal Nufi, ky i fundit zv/shef i kabinetit të Kryeministrit.
Elira Kokona pritet të paraqitet në prokurori ditën e martë, më 24 shkurt, në orën 11:30. Procedimi penal nr. 4113 i vitit 2025 është regjistruar mbi bazën e kallëzimit të bërë nga Thanas Biqiku.
Sipas burimeve, çështja mund të kalojë për kompetencë në SPAK, në varësi të ecurisë së hetimeve dhe natyrës së veprave penale që po verifikohen.
