Presidenti i Ekuadorit, Daniel Noboa, ka urdhëruar një ofensivë të gjerë ushtarake dhe policore kundër minierave të paligjshme që, sipas autoriteteve, kontrollohen nga kartelet e drogës dhe rrjete të tjera kriminale të lidhura me trafikun ndërkombëtar. Operacionet janë zhvilluar kryesisht në provincat Imbabura, Zamora-Chinchipe dhe Azuay, zona të njohura për shfrytëzimin ilegal të arit, bakrit dhe koltanit – një mineral i rrallë i përdorur në industrinë elektronike dhe ushtarake.
Sipas raportimeve të Reuters, ushtria ka shpërthyer dhe mbyllur dhjetëra tunele minierash të paligjshme, ndërsa pas aksioneve janë regjistruar shpërthime në ura dhe akte hakmarrjeje nga grupet kriminale. Autoritetet besojnë se disa prej këtyre strukturave janë përdorur si kanale për pastrimin e parave të fituara nga trafiku i kokainës, një problem që e ka kthyer Ekuadorin në një nga qendrat kryesore të trafikut në Amerikën Latine.
Presidenti Noboa e ka përshkruar situatën si një “konflikt të armatosur të brendshëm”, duke shpallur 22 grupe kriminale si “akteurë të armatosur jostatë” dhe duke autorizuar përdorimin e ushtrisë në terren për të rivendosur rendin dhe sovranitetin ekonomik.
Burime ndërkombëtare dhe media lokale kanë raportuar prej kohësh për praninë e strukturave të mafies shqiptare në Ekuador, kryesisht në trafikun e kokainës dhe pastrimin e parave përmes kompanive eksportuese të bananeve. Një hetim i medias ekuadoriane zbuloi se disa kompani të regjistruara nga shtetas shqiptarë janë përdorur si “mbulesë” për eksport droge drejt Europës.
Në janar të këtij viti, një gjykatë ekuadoriane dënoi tetë persona në një çështje që përfshinte 43 milionë dollarë të pastruara përmes skemave të lidhura me rrjete shqiptare, ndërsa figura të njohura si Dritan Gjika, i quajtur nga shtypi “kreu i mafies shqiptare në Ekuador”, janë identifikuar si pjesë e këtyre rrjeteve.
Megjithëse nuk ka prova publike që lidhin drejtpërdrejt mafien shqiptare me minierat ilegale, autoritetet nuk e përjashtojnë mundësinë që këto struktura të përdoren si burim i ri pastrimi parash për rrjetet ndërkombëtare të trafikut të drogës.
