Është zbardhur ekspertiza mjeko-ligjore për vdekjen e Gjergj Tushes, 65 vjeç, i cili u gjet i pajetë një ditë më parë në afërsi të lumit Mat, në fshatin Pllanë të Lezhës.
Fillimisht u dyshua se viktima kishte plagë të shkaktuara nga armë zjarri, por ekspertiza ka përjashtuar këtë pistë, duke përcaktuar se në trupin e tij nuk janë konstatuar plagë të tilla. Në trupin e të ndjerit janë gjetur dëmtime të shumta dhe thyerje brinjësh.
Sipas të dhënave hetimore, Tusha ndodhej me bagëtitë në momentin e ngjarjes dhe dyshohet se mund të jetë goditur nga demi që ruante, pasi në brirët e kafshës janë gjetur njolla gjaku. Edhe bashkëshortja e viktimës ka dëshmuar se demi ishte i egër dhe se e kishte paralajmëruar të shoqin për rrezikun që paraqiste.
Policia e Lezhës njofton se grupi hetimor ka kryer të gjitha veprimet procedurale, përfshirë këqyrjen e vendit të ngjarjes, trupit të viktimës, marrjen e dëshmive dhe analizën e pamjeve filmike. Materialet i janë referuar Prokurorisë së Lezhës për hetime të mëtejshme, ndërsa ngjarja po trajtohet si e dyshuar aksidentale.
