Policia e Dibrës ka finalizuar operacionin e koduar “Vendimi”, duke arrestuar një shtetas të shpallur në kërkim kombëtar dhe ndërkombëtar.
Në kuadër të punës për kapjen e personave në kërkim, strukturat hetimore të Drejtorisë Vendore të Policisë Dibër, në bashkëpunim me Forcat e Posaçme “Shqiponja”, ndërmorën në orët e para të mëngjesit aksionin në zonën e Maqellarës, ku u bë e mundur kapja e Klodian Llomit (Mazari), 35 vjeç, banues në fshatin Kërçisht.
Sipas policisë, Gjykata e Apelit ka njohur vendimin e Gjykata e Apelit e Romës, e cila e ka dënuar 35-vjeçarin për veprat penale “Organizatë kriminale”, “Shfrytëzim prostitucioni” dhe “Trafikim i lëndëve narkotike”, të kryera në Itali. Ai duhet të vuajë edhe 6 vite, 7 muaj e 2 ditë burg nga dënimi i mbetur.
Gjatë zhvillimit të operacionit, një punonjës policie i Forcës së Posaçme “Shqiponja”, inspektor me iniciale G.M., është rrëzuar nga një mur rrethues gjatë momentit të kapjes së të kërkuarit, duke pësuar dëmtime trupore. Efektivi është transportuar me helikopter drejt Tiranë për ndihmë mjekësore më të specializuar.
