Në mbledhjen e sotme të Këshillit të Lartë të Prokurorisë, Doloreza Musabelliu, e vetmja grua në garë për kreun e SPAK, prezantoi platformën dhe vizionin e saj për institucionin.
Gjatë fjalës së saj, Musabelliu theksoi se motivimi i saj për të kandiduar buron nga “dëshira dhe ndjenja e përgjegjësisë”, duke nënvizuar se përvoja mbi dy dekada në drejtësi garanton një drejtim të suksesshëm të SPAK-ut. Ajo premtoi një drejtim të pavarur, të vendosur dhe të orientuar drejt rezultateve konkrete.
Kandidatja shtoi se synon jo vetëm hetimin e çështjeve penale, por edhe përmirësimin e standardeve ligjore, rritjen e transparencës dhe cilësisë së hetimeve. Një nga prioritetet e saj kryesore është ndërtimi i një marrëdhënieje transparente me mediat, duke respektuar sekretin hetimor dhe integritetin e institucionit.
“Gjatë ushtrimit të detyrës kam hetuar çështje me ndjeshmëri dhe vëmendje të lartë publike, ku media ka luajtur një rol të rëndësishëm. Kam respektuar gjithmonë integritetin hetimor, duke vendosur balancë midis sekretit dhe të drejtës për informim. Në drejtimin e SPAK, e konsideroj thelbësore ndërtimin e një marrëdhënieje të drejtë dhe profesionale me mediat, pa cenuar sekretin hetimor dhe reputacionin e institucionit,” deklaroi Musabelliu.
