SPAK goditi pak javë më parë një prej grupeve më të rrezikshme kriminale që operonte në Vlorë, të drejtuar nga Inez Hajrulla, mëkëmbësi i Edison Harizajt, i njohur si Edison Faqedjeguri, pas vrasjes së këtij të fundit në 2018 në Durrës.
Një nga akuzat që rëndon mbi supet e tij është vrasja e Gentjan Qarrit, i njohur si Geçe, më 6 shkurt 2021 në Vlorë.
Sipas SPAK, Inez Hajrulla, bashkë me Ervis Matodashaj, dyshohen në rolin e porositësit, financuesit dhe organizatorit të vrasjes së Geçes, i cili është kushëri i Fatmir Hysenit, i njohur si Doqja, që e konsiderojnë si kundërshtarin e tyre më të fortë.
“Më datë 30 janar 2021, Ervis Matodashaj komunikon me Inez Hajrulla, ku shfaqin interesa në lidhje me vendndodhjen e shtetasve të quajtur “Doqja”, “Cipua” dhe “Geco”, me qëllim kryerjen e një vrasjeje në drejtim të grupit rival. Rezulton se shtetasi i njohur me nofkën “Doqja” është Fatmir Hyseni, me nofkën “Cipuri” njihet Armando Sulejani dhe me nofkën “Geco” njihet shtetasi Gentjan Qarri. Nga burimet e hapura rezulton se ndërmjet këtyre shtetasve dhe Inez Hajrulla dhe Ervis Matodashaj ka një hakmarrje mes dy grupeve kriminale që ka vijuar me tentativa për të eliminuar njëri-tjetrin”, thuhet në dosjen e SPAK.
Më 31 janar 2021, Matodashaj komunikon me Inez Hajrullën, ku për shkak të konfliktit që kanë, Inezi e paralajmëron Ervisin që të ketë kujdes, pasi ka informacion nga grupi rival që mund t’i dëmtojnë.
“Ai kërkon angazhimin e Ervisit për të gjetur vendndodhjen e “Doqes”, si dhe është i interesuar për vendndodhjen e Geçes”.
Inez Hajrulla e orienton Ervisin që të komunikojë me persona të tretë që të gjejë vendndodhjen e rivalëve.
Inezi: Hiç vëlla, këtu në hotel. Kujdes mos dil fare, se gati janë ata rob… për dëm.
Ervisi: Ok vëlla.
Inezi: E ke takuar Ballin? Vije pak në linjë që të merret me atë që ka info për Doq.
Ervisi: E kam takuar, do më thotë vetë.
Inezi: I kish thënë atij që shpejt vëllezërit do bëjnë dëm, se janë këtu të gjithë dhe Cipua ka heq familjen.
Ervisi: Po i gjen dot foto?
Inezi: Atë Geçon shiko.
Ervisi: Ku rri tani, te lokali i tij, ku rrinte? S’e di kush është Geçe vëlla, duhet të mësoj ku rri.
Inezi: E ke përballë me Landin e frenave.
Ervisi: Ai Gecua e ka pas shtëpinë shpejt te pallati “Çiq”, kati 5. Do pyesësh njëherë Kokuq. Mos e njoh, e ka parë, rri aty.
Inezi: OK.
Nga komunikimet rezulton se Hajrulla dhe Matodashaj flasin me persona të tretë që kanë informacion për Geçen dhe e përgjojnë. Në një moment, Hajrulla, që ndodhet jashtë vendit, këmbëngul që të kthehet në Shqipëri me qëllim koordinimin e veprimeve për një ngjarje kriminale.
Pas ekzekutimit të Gentjan Qarrit, Inez Hajrulla dhe Matodashaj zhvillojnë biseda ku interesohen në mënyrë të drejtpërdrejtë për largimin e mjetit të përdorur në ngjarje, reagimin dhe veprimet e forcave të policisë, si dhe faktin nëse viktima ka ndërruar jetë (Gentjan Qarri fillimisht mbeti i plagosur dhe ndërroi jetë në spital).
Ervisi: Atë e mori ambulanca.
Inezi: Deri te shkallët do vejë, po e ka marrë ambulanca.
Ervisi: Thjesht po bëjnë pika.
Inezi: Mbaroi ai vëlla.
Ervisi: Këta (policia) po kërkojnë golf.
Inezi: Po ça thua, kanë ngatërruar makinë, mu te Milano janë ata.
Ervisi: Kush ka ngatërruar makinën?
Inezi: Shteti, në vend të makinës së saktë kanë thënë golf.
Inezi: Hajde rrimë bashkë. Ku do venë ata, s’është mirë t’i sjellin këtu, të venë në hotel aty.
Ervisi: Jam me Spicin poshtë, s’po thotë gjë. Mos mbajmë kobure me vete, se mos na ndalojnë. E dogjën makinën.
Inezi: Se si s’më kanë shkruar.
Ervisi: Po çojnë patrulla nga SODA (Pylli i Sodës), do kenë djegur makinën.
Inez Hajrulla dhe Ervis Matodashaj, që konsiderohet si krahu i tij i djathtë, janë në kërkim. Ata akuzohen edhe për krijim të kushteve për të kryer vrasjen e Bledar Birçaj.
