Babai dhe vëllai i Jurgen Karajt, i cili dyshohet se është marrë nga rrjedha e prroit të fshatit Dares, u kanë bërë apel institucioneve shtetërore që të intensifikojnë kërkimet për gjetjen e tij.
Ngjarja ka ndodhur rreth orës 01:00 pas mesnate, kur automjeti me të cilin udhëtonin dy të rinj ka përfunduar në prroin e fshatit Dares. Drejtuesi i mjetit ka arritur të dalë nga makina dhe më pas është arrestuar nga policia, ndërsa pasagjeri, Jurgen Karaj, rezulton i zhdukur prej 9 ditësh.
Pavarësisht kërkimeve intensive të zhvilluara nga forca të shumta policie dhe ekipe shpëtimi, në një perimetër që shtrihet nga zona e Ulzës deri në vendin ku automjeti përfundoi në rrjedhën e prroit, ende nuk është gjetur asnjë gjurmë e Jurgen Karajt.
Babai i tij, Shaban Karaj, dhe vëllai, Endrin Karaj, kërkojnë shtimin e forcave dhe mjeteve për vijimin e operacionit të kërkimit, duke theksuar se zbardhjen e ngjarjes ia kanë lënë drejtësisë dhe presin vetëm gjetjen e familjarit të tyre.
“Kërkoj vetëm të më gjejnë vëllanë dhe të ma sjellin në shtëpi. Zbardhjen e ngjarjes le ta bëjë policia. Dua ta di ku e kam, ta varros. Kanë kaluar 9 ditë dhe nuk kemi asnjë shenjë prej tij. I bëj thirrje kryeministrit që të angazhohen më shumë forca për kërkimin”, shprehet vëllai i Jurgen Karajt.
