Prej orëve të para të mëngjesit të sotëm, në Kanionet e Osumit po vijojnë kërkimet për gjetjen e 42-vjeçarit Ilir Kurti, i cili dyshohet se është hedhur në lumë mbrëmjen e 19 shkurtit.
Kërkimet po zhvillohen përgjatë gjithë gjatësisë së kanioneve. Mesditen e sotme, forcat e angazhuara kanë konstatuar në ujë një palë atlete që dyshohet se i përkisnin 42-vjeçarit natën e ngjarjes. Rryma e fortë e lumit ka vështirësuar ndjeshëm operacionin, ndërsa ekipet vijojnë punën në terren.
Dyshohet se 42-vjeçari është hedhur në lumë në vendin e njohur si “Ura e Blezënkës”, në afërsi të kanioneve. Në zonë janë gjetur mjeti me të cilin ai lëvizte, sende personale dhe telefoni celular.
Në operacionin e kërkimit janë angazhuar polumbarë, Forcat e Ushtrisë, efektivë të Repartit të Ndërhyrjes së Shpejtë, si edhe banorë e familjarë të të zhdukurit. Pavarësisht përpjekjeve intensive, deri më tani nuk është bërë e mundur gjetja e trupit.
Hetimet vijojnë për të sqaruar plotësisht rrethanat e ngjarjes.
