Dy vëllezër shqiptarë, persona me precedentë penalë, janë arrestuar nga policia greke si autorë të dyshuar të shpërthimit me eksploziv në diskotekën “Jacky.O”, në rrugën Michalakopoulou të Athinës, ngjarje e ndodhur mbrëmjen e 7 tetorit 2025.
Në pranga ranë Blerim Buci, 41 vjeç, dhe Besmir Buci, 32 vjeç, të dy banues në Tiranë. Përveç akuzës për vendosje eksplozivi, ndaj tyre ishte në fuqi edhe një urdhër arresti për shkelje të kushteve kufizuese të qëndrimit, grabitje dhe shkelje të ligjeve mbi armët.
Sipas hetimeve, 32-vjeçari Besmir Buci ka qenë ekzekutori i drejtpërdrejtë i aktit. Ai dyshohet se pasi parkoi automjetin pranë diskotekës, iu afrua objektit në këmbë dhe vendosi një pajisje shpërthyese të improvizuar, të cilën e aktivizoi më pas. Menjëherë pas shpërthimit, ai u largua me automjetin ku e priste vëllai i tij, Blerim Buci. Automjeti u rezulton t’u ishte siguruar nga një bashkëpunëtor i tyre, një 44-vjeçar grek.
Gjatë kontrolleve të policisë u sekuestruan një thikë palosëse, tetë telefona celularë, një pajisje telekomandimi me ekran, dy fletore me shënime, veshje të përdorura gjatë shpërthimit, si dhe automjeti i përdorur për kryerjen e aktit.
Njëri prej të arrestuarve ka pranuar pjesërisht përfshirjen, duke deklaruar se ishte paguar 5,000 euro nga një çift që kishte konflikte të mëparshme me pronarin e lokalit. Sipas autoriteteve greke, shpërthimi ishte një “mesazh paralajmërues”, pasi autorët kishin kërkuar para për ofrimin e mbrojtjes së paligjshme, por pronari i diskotekës kishte refuzuar t’i nënshtrohej shantazhit.
Gjatë operacionit për arrestimin, 41-vjeçari Blerim Buci u gjet i fshehur në një zonë të hapur dhe rezistoi dhunshëm ndaj policisë, duke goditur efektivët me duar dhe këmbë, por u neutralizua dhe u vu në pranga.
Të dy të arrestuarit rezultojnë me një të kaluar kriminale, ku përfshihen vepra si vjedhje, grabitje, mashtrim, falsifikim, dëmtime të rënda trupore dhe shkelje të ligjeve për drogën. Ata janë dërguar tashmë pranë autoriteteve kompetente të ndjekjes penale në Greqi.
