Dy të rinj janë shpallur në kërkim nga policia, pasi dyshohet se kanë mbajtur peng një 56-vjeçar në zonën e Kamzës. Viktima, Përparim Mehmeti, raportohet se është mbajtur kundër dëshirës së tij për disa orë brenda një banese.
Sipas burimeve zyrtare, autorët e dyshuar të ngjarjes janë shtetasit me inicialet E.Z. dhe E.N., të dy 28 vjeç. Dyshohet se ata kanë ndërmarrë këtë veprim për shkak të një konflikti të mëparshëm me djalin e të rrëmbyerit.
"Shërbimet e policisë kanë shpallur në kërkim shtetasit E.Z., 28 vjeç dhe E.N., 28 vjeç, pasi dyshohet se kanë privuar nga liria për disa orë një shtetas 56-vjeçar, për shkak të një konflikti me djalin e tij. Vijon puna për kapjen e tyre dhe dokumentimin e plotë të rastit", thuhet në njoftimin e Policisë së Shtetit.
