Tirana është tronditur nga dy ngjarje të rënda brenda pak orësh, njëra me pasojë vdekjen e një të riu dhe tjetra me plagosjen e një 34-vjeçari në mes të kryeqytetit.
Sulmi fatal ndaj Egli Pashollarit
Egli Pashollari u sulmua sapo doli nga makina e tij nga tre persona, dy djem dhe një vajzë. Sipas informacioneve paraprake, konflikti ka degjeneruar në përleshje fizike dhe gjatë saj njëri prej agresorëve e ka goditur të paktën një herë në kurriz.
Atij iu dha ndihma e parë pranë një lokali në zonë dhe më pas u transportua me urgjencë drejt spitalit nga persona që ndodheshin në vendngjarje. Fatkeqësisht, Pashollari nuk arriti t’u mbijetojë plagëve dhe ndërroi jetë gjatë rrugës për në spital.
Mësohet se Egli Pashollari ka qenë gardian i burgut 313 në Tiranë.
Autoritetet po hetojnë për zbardhjen e plotë të rrethanave dhe identifikimin e përgjegjësve.
Plagosje me armë zjarri në “Rrugën e Kavajës”
Pasditen e sotme, një tjetër ngjarje e rëndë u shënua në “Rrugën e Kavajës” në Tiranë, ku një person u plagos me armë zjarri.
Sipas policisë, i plagosuri është 34-vjeçari Akil Koxhaxhiku. Ai është transportuar për ndihmë mjekësore dhe fatmirësisht ndodhet jashtë rrezikut për jetën.
Policia ka nisur hetimet për të identifikuar autorin dhe për të zbardhur motivet e plagosjes.
Dy episode të rënda dhune në zemër të kryeqytetit kanë ngritur sërish shqetësimin për sigurinë publike, ndërsa pritet reagimi i autoriteteve dhe zbardhja e plotë e rrethanave të secilës ngjarje.
