Dy shtetase iraniane janë shoqëruar në Policinë e Tiranës, pas denoncimeve të qytetarëve për lëvizje të dyshimta në zona të ndryshme të kryeqytetit.
Sipas raportimeve të bëra nga qytetarët me foto dhe video në rrjetet sociale, dy gratë dyshohet se kanë tentuar të afrohen dhe të komunikojnë me fëmijë, duke ngritur dyshime mbi qëllimet e tyre dhe aludime për raste të mundshme të rrëmbimit të të miturve.
Pas këtyre sinjalizimeve, policia ka bërë identifikimin dhe shoqërimin e tyre në ambientet e Drejtorisë Vendore të Policisë Tiranë, ku po kryhen veprimet procedurale përkatëse.
Sipas njoftimit zyrtar, shtetaset janë me inicialet M. G. dhe A. G. Autoritetet theksojnë se, deri më tani nuk ka asnjë provë që ato të kenë kryer veprime të kundërligjshme ndaj të miturve. Megjithatë verifikimet për këtë rast vijojnë.
