Mariglen Qorri, 40 vjeç, eksportues perimesh dhe pronar i kompanisë “Era-Fruit”, së bashku me dy punonjës të Autoritetit Kombëtar të Ushqimit (AKU), Griselda Doksani dhe Ronaldo Lika, të dy 25 vjeç, janë paraqitur sot në Gjykatën e Shkallës së Parë të Jurisdiksionit të Përgjithshëm Berat, për t’u njohur me masat e sigurimit personal.
Në ambientet jashtë gjykatës, ishin të pranishëm familjarë, fermerë dhe eksportues të tjerë, të cilët shprehën mbështetje për Qorrin.
Prokurorja e çështjes, Arjeta Plaku, pasi lexoi akuzat ndaj të arrestuarve, kërkoi cilësimin e ligjshëm të arrestimit dhe aplikimin e masës së sigurisë “arrest në burg” për të tre personat.
Pas shqyrtimit të kërkesës dhe dëgjimit të mbrojtjes së avokatëve, gjyqtarja Ardiola Çela vendosi të cilësojë arrestimin si të ligjshëm. Ajo caktoi masën “arrest në burg” për Mariglen Qorrin, ndërsa për dy punonjësit e AKU-së vendosi “arrest shtëpie”.
Arrestimet u kryen të mërkurën, në kuadër të operacionit policor të koduar “Again”, i finalizuar nga Seksioni për Hetimin e Krimeve Ekonomike dhe Financiare në bashkëpunim me Forcën e Posaçme Operacionale, nën drejtimin e Prokurorisë së Beratit.
Qorri, banues në Kuçovë, akuzohet për disa vepra penale: “Importimi, prodhimi, shitja dhe ruajtja e ushqimeve të rrezikshme për shëndetin ose jetën e njerëzve”, “Mashtrim me produktet ushqimore”, si dhe “Falsifikimi i dokumenteve”.
Sipas dosjes hetimore të prokurorisë, ai kishte eksportuar drejt Kroacisë 8 tonë domate me përmbajtje të lartë të substancës së ndaluar “Chlorefenapyr”, ngarkesë e cila u bllokua dhe u asgjësua nga autoritetet kroate. Për të shmangur përgjegjësinë, Qorri dyshohet se përdori fatura fiktive, duke simuluar blerje nga fermerë të tjerë.
Ndërkohë, punonjësit e AKU-së, Griselda Doksani dhe Ronaldo Lika, akuzohen për “Shpërdorim detyre”, pasi dyshohet se gjatë kontrollit në subjekt kanë plotësuar dokumentacionin në mënyrë fiktive, duke lejuar kështu daljen e produktit të rrezikshëm jashtë vendit.
